阿Sa痛失良基兩度含淚

阿Sa於3時許乘保母車離開跑馬地香閨，到馬鞍山會合阿嬌和fans坐開篷巴士出席Twins粉絲團「人人彈起　火鍋好味」大食會，被爆由婚變分的阿Sa全程強顏歡笑，悶悶不樂，雖然在場有200粉絲打鑼吶喊，但阿Sa依然笑唔出，提到Ronald時更兩度眼紅紅，淚水差點兒掉落！

阿Sa全程由阿嬌和英皇唱片及藝人管理部總監霍汶希陪在左右，以行動和精神支撐着她，以下是訪問內容——

記：心情有冇好啲？

Sa（木無表情）：都係咁，都OK。

記：記者會後有冇同Ronald傾？

Sa：呢啲唔講嘞。

記：你個樣好無心機，雙眼仲紅晒！

Sa（強唧笑容）：冇，喉嚨有啲唔係好舒服。

記：咁多狗仔隊跟驚唔驚？

Sa：自己唔驚，但爹哋、媽咪驚啲，好多狗仔跟。

記：Ronald件事有冇影響工作？

自己承擔後果

Sa（裝堅強）：我得架啦。

記：外間話你哋講大話？

Sa（無奈地）：尋日已經講咗，我哋諗住當一個秘密，守住呢個秘密，所以先講大話。

記：有冇後悔瞞婚？

Sa：冇得咁講，我覺得所有嘢最後自己承擔後果。

記：外界幫你哋計身家？

Sa：唔使計，我負擔得起我生活，佢負擔得起佢生活。

記：Ronald唔需要畀贍養費？

Sa（笑一笑）：定係我呀？唔使，我可以搞得掂自己。

記：有冇覺得身邊人洩露風聲？

Sa（肯定地）：我覺得一定有。

傷心被人出賣

記：緝兇？

Sa：唔知點緝，範圍好細，但自己心裏有數。

記：最傷心一部分？

Sa：係，其中一樣好傷心地方。

記：外間傳你哋真結婚假分手？

Sa：分手可以用時間慢慢知道，要講嘅都講咗，亦交代清楚，希望可以慢慢淡化呢個問題。

記：離婚手續搞掂未？

Sa（抹一抹鼻子，苦笑）：一路處理緊，處理咗一段時間。

記：離婚三個月搞掂？　

Sa：呢樣嘢唔講，細節唔需要講，結果講畀大家聽就係咁。

記：有冇擔心fans受傷害？

Sa：有啲嘢自己要承擔番。

記：之前點解瞞公司？

Mani搶答：都話明秘密，個個知就唔係秘密。

Sa：知嘅人好少。

記：阿嬌知唔知？

Sa：真係一個人都唔知，只係屋企人同一、兩個朋友，自己心中有數。

記：質問嗰個人？

Sa：唔使啦，過咗去就算，呢啲係我同Ronald經歷，係一個教訓，一個回憶。

阿嬌全力支持

記：陳慧琳話你兩個咁唔捨得，點解唔畀機會自己？

Sa（雙眼通紅強忍淚水）：細節唔交代，之前已經分開一段時間，最無奈最尷尬分開後有呢啲新聞，要回應都好難。

記：有冇機會復合？

Sa：尋日交代咗，唔再講，將來事唔知。

記：唔捨得？

Sa（吞口水，又想喊）：兩個人一齊咁多年，我哋唔係常人拍拖經歷，係一段好難忘回憶。

阿嬌全程在旁伴着阿Sa，讓她感受友情的溫暖，問點支持阿Sa？阿嬌說：「以行動支持，唔使講。」記者指阿Sa雙眼紅晒，阿嬌分擔搶答：「我都係。」阿Sa謂做完演唱會後想放假，霍汶希即拍一拍阿Sa膊頭兼點頭，全力支持阿Sa，令阿Sa十分窩心，而活動完結後，阿Sa即返家休息。

採訪：音樂組