盧巧音單拖出巡頭耷面黑
愛情至上嘅盧巧音(Candy)，同樂隊Kolor嘅主音蘇浩才（Sammy）拍拖日子雖然只有年多，但經常出雙入對甜到漏。早前八太見到Candy獨自喺中環行街，唔知係咪冇男友陪嘅關係，見佢全程黑口黑面，好似嬲咗成村人咁，生人勿近。
現年35歲嘅Candy，向來唔會掩飾戀情，亦偏愛玩姊弟戀，自從前年同細自己十年嘅紋身師傅分手後，火速搭上黃家強旗下樂隊Kolor嘅主音兼結他手Sammy，兩人拍拖冇耐，男方已搬去Candy喺大坑嘅香閨同居，仲成日畀人影到拍住拖去買餸，愛得鬼咁癡纏。
儲錢為將來
雖然男友細自己四年，但Candy話男友思想成熟，同自己火爆嘅性格可以互補不足，仲話已經開始為將來嘅生活儲錢，認定男友係結婚對象。早前Kolor開騷，Candy做嘉賓上台同男友合唱，台下嘅粉絲叫佢做「才嫂」，當時Candy不知幾咁受落，之後佢又話唔習慣畀人咁稱呼，叫大家下年先叫，言語間即係好事近啦！
微笑Say Bye
早前八太去咗中環「濕平」，拎住幾袋戰利品諗住打的，咁啱喺對面見到戴住Cap帽嘅Candy，啱啱係附近商場行完街，一個人行咗去等的士。大熱天時仲着住件長袖外套，真係見多陣都滴汗！當時係晏晝四點幾，個的士站鬼咁旺場排晒長龍，而Candy都好有秩序咁排隊，又不時翹住手托腮低頭沉思，期間雖然有唔少人認出，但係Candy就好似嬲咗成村人咁，全程黑口黑面，Cool到爆！排咗十幾分鐘，終於輪到Candy上車，上車前一刻，佢見到八太就即刻180度變臉，微微笑住咁同八太揮手Say Bye！八太真係有啲受寵若驚。幾時都話女人係善變動物啦！睇吓Candy都係一個好例子。