洪卓立被玩三改電話
洪卓立（Ken）昨日為新歌到電台宣傳，提到早前陳偉霆自爆被電話騷擾，他表示：「佢發生之前我一直都畀人玩緊電話，曾經有個人凌晨四點打畀我，話係郭品超朋友，叫我帶佢去旺角行吓，但明明郭品超就冇我香港電話！」他表示過去三年都不停畀電話騷擾，令他迫不得已改過三次電話號碼，他說：「我諗係有圈中人唔見咗電話，所以掌握到好多人嘅電話喺手！」
對於經理人霍汶希將放大假半年，Ken說：「之前都有同佢傾出碟嘅事，佢都安排下年有套戲畀我拍，其實佢係好細心嘅人，一切都安排好晒先起行，不過我相信有咩事都會照打畀佢！」