發脹君如紮紮跳唔認有孕
吳君如開腔否認懷孕之說，還公然「認衰」向甘國亮認錯。台上蹦蹦跳的她深知未能因此平息外界推測，惟有叮囑大家「放長雙眼」，留待時間驗證自己是否大話精。
君如昨偕同周慧敏（Vivian）、張兆輝、陳偉霆及萬綺雯，到商場宣傳新片《得閒炒飯》，即場與戲迷玩遊戲。盛傳懷有身孕的君如全程恍如「甩繩馬騮」，當記者叮囑她小心時，身形明顯發脹的君如更抵死地在台上蹦蹦跳及扮疾走。
不介意被利用
一如當年懷有愛女是知初期，君如「貫徹始終」否認有孕之說。她說：「我今次衰係衰在人哋開鏡（指甘國亮新戲《熱愛島》）前兩日先正式辭演，因為我三心兩意唔夠斬釘截鐵，劇組都有自己嘅問題，一度『失蹤』咗三個禮拜，套戲話唔開又開！總之今次有人嬲係應該嘅，我要同甘先生及任達華say sorry。（覺唔覺得有人利用你嚟宣傳？）唔緊要啦呢行。（甘生話佢首選女主角係劉嘉玲喎！）佢心目中可以有一百個女主角，我真係唔知呀，但戲裏面三個女仔戲份都幾平均嘅。」
君如自知這樣的澄清未能平息大家疑團，更有記者直指她明顯發胖，「舊事重提」當年她懷孕亦死口唔認。君如惟有表示：「大家放長雙眼睇囉！總之唔接戲係因為Peter（陳可辛）去咗雲南拍戲，個女又放緊暑假。（去雲南搵Peter造人？）嘩，嗰度二千幾呎咁高，老人家唔好搵啲咁嘢嚟搞！我係話Peter呀！」記者嘗試聯絡Peter，惟截稿前仍未獲回覆。
周慧敏信冇孕
身為君如好友的Vivian，亦呼籲傳媒放過君如：「畀多啲私人空間佢啦，佢話冇我信架。」她又自爆有人以「周慧敏」開設微博及網誌，故叫大家不要上當。她說：「我需要多啲私人空間，暫時冇諗過開呢啲嘢，我都係鍾意寫信、打電話同傳短訊去聯絡多啲。」她又直認刻下有幾部電影接洽中。
文：影視組