林嘉欣秘密完婚加國待產

影壇甜姐兒林嘉欣入行以來緋聞不多，早前突然盛傳她戀上已婚廣告導演袁劍偉（Steve），指兩人於08年經嘉欣前男友陳光榮介紹認識，暗交兩年令袁妻相當激動。至於事件女主角林嘉欣於今年三月十八日出席完一個公開活動後突然銷聲匿迹，期間一度傳出她有意退出娛樂圈，後來又有消息稱目睹嘉欣於加拿大多倫多的聖瑪麗綜合醫院，接受孕婦定期檢查。

離婚後發展

嘉欣戀上已婚漢兼未婚懷孕的消息四散，昨日袁劍偉終於站出來，接受本報記者電話訪問，親口剖析和嘉欣的關係，證兩人已於今年在加拿大結婚，嘉欣的確懷了身孕，正於加拿大待產，袁劍偉堅稱嘉欣並非第三者，兩人在他離婚後始開始發展。以下是袁劍偉與記者的對話。

袁：袁劍偉　記：記者

袁：我覺得需要交代一啲嘢，其實我覺得有啲報道唔啱，尤其寫我前妻，我已經離婚一段時間，我前妻性格好平和，絕對唔係雜誌所講咁嘅人，呢樣係我最想講，因為啲報道對佢好唔公平，實情唔係咁樣。林嘉欣亦唔係第三者，我同佢已經結咗婚，一切係step by step，我同嘉欣係喺正常程序下發生，我同太太離婚後先同嘉欣拍拖嘅。

記：有傳嘉欣為追你，同你住同一大廈，同埋話你前妻叫記者唔好提嘉欣？

袁：冇咁嘅事！咁誇張，我同嘉欣都好低調，我哋一直冇諗過要隱瞞任何嘢，只係想低調，因為屋企有喜事。

未知仔定女

記：幾時結婚？

袁：係今年嘅事，有行禮，係喺加拿大，唔鋪張嘅，只係同啲屋企人同好好嘅朋友食飯，冇圈中人參與。

記：嘉欣生咗係咪會復出？

袁：睇佢意願。

記：唔想嘉欣湊BB咩？

袁：當然希望！

記：仔定女？

袁：唔知。

記：驚BB小器？

袁：唔識呢啲嘢。

記：鍾意仔定女？

袁：哈哈，唔好「chok」我啦。

記：十一月生？

袁：唔講咁多嘞。

記：係咪喺加拿大生？

袁：係！

記：點解唔喺加拿大陪嘉欣？

袁：香港有好多嘢做，佢屋企都好多人take care佢。

記：林嘉欣同胎兒情況好嗎？

袁：好好！多謝關心。

而嘉欣的一眾好友得知她雙喜臨門後，均為她找到好歸宿而高興，紛紛送上祝福。

文：影視組