袁彌明斥封城老土
對於無綫採取「封城計」，眾藝人議論紛紛，其中向來敢言的白韻琴更大拋金句回應事件。
白韻琴：「天國近了，你們應該悔改。（點睇陳志雲被捕？）TVB都唔係第一次有呢啲嘢發生，嗰啲人都返番去做架，有啲事後仲升官發財添！套用佛家講法：『福兮禍所起，禍兮福所歸』，人生無常，福禍難測。」
袁彌明：「咁搞笑？無綫自己做傳媒都唔畀傳媒入嚟？咁樣只會令件事愈鬧愈大。我覺得無綫今次嘅作風好老土，咁樣封鎖消息，當自己王朝咁，佢哋請得呢個人（指陳志雲）做高層，冇理由人哋一有事就縮沙囉！（有冇少少同情陳生？）我唔知佢做過啲乜喎，如果佢真係有做錯事，唔值得同情囉！不過有冇做過就佢自己先知咯。」
肥媽：「得架咩？政府都唔可以咁做，我本來對呢件事都冇咁大興趣，聽完封台即刻興趣大咗，等我上網check住有咩新料先。（點睇陳生被捕？）賺咁多錢一個月、話捧邊個就捧邊個嘅人，點會捲入呢啲事入面架？」
何韻詩：「同陳志雲唔熟，有次飲醉，陳生咁啱坐隔籬，我攬住佢喊。其實今次唔係圈中第一次類似事件，不過未有結論就唔好妄下判斷。」
