諸葛梓岐晒命：公司好錫我
諸葛梓岐（Marie）日前指樂基兒（Gaile）還未約滿舊公司，前晚Marie出席飯局時，澄清只是一場誤會，她說：「我當時係話唔知，其他人誤會咗我嘅意思，我好唔捨得Gaile走，希望佢多啲返『娘家』。（怕唔怕Gaile誤會你？）唔會，我同佢同公司，大家好熟，係我好勁嘅師姐，我好敬重佢。（跟Gaile過檔新公司？）我未約滿，暫時唔考慮呢個問題，但我同公司合作愉快，公司好錫我。」
另外，Marie將前往日本與周秀娜及Angelababy同場行騷，她稱大家會互相鼓勵，為港模爭光。不過，她笑言因已「大個女」，故不會再瘋狂購物：「依家想增值自己，學唱歌跳舞，希望多方面發展，（去唱K練歌？）唱K同練歌係兩回事，我好鍾意唱歌，最鍾意唱容祖兒嘅歌，最想同劉青雲拍戲。」問到男友薛嘉麟是否忙公司合併事宜？她說：「我哋好少時間見面，見面亦只會互相支持同關心，唔會講工作。」