樂基兒買樓 黎明no pay

樂基兒（Gaile）昨日與另一「天王嫂」熊黛林（Lynn）同為Mulberry春夏時裝系列行騷，同場還有Mandy Lieu、Jocelyn和戴小奕等模特兒。時裝騷由Lynn打頭陣，Gaile則任壓軸。雖然日前有報道指在另一活動上Gaile拒與Lynn合照，但Lynn就表示兩人沒事，她說：「我有同佢打招呼，佢都冇嘢。（上次佢好似唔肯同你合照喎？）冇嘢o架，誤會嚟之嘛，佢都講咗嗰晚咁多人，佢聽唔到啫。（佢親自同你解釋？）我睇報紙寫，你哋寫我就信o架喇。」

剛於農曆新年前宣布分手的Mandy Lieu，無損大勇狀態。

戴小奕（左起）、熊黛林、品牌設計師、樂基兒、Mandy Lieu和Jocelyn齊謝幕，熊黛林與樂基兒更有傾有講。

唔抗拒夫妻檔搵銀

轉投了新經理人公司的Gaile則表示未有因此而加價，至於可會與同公司的老公黎明（Leon）以夫妻檔上陣接Job？她說：「應該唔會，不過世事無絕對。」對於近日有報道指Leon豪送逾千萬堡壘式豪宅予Gaile父母，Gaile曾揚言不會回應八卦雜誌的事，但昨日她忍不住回應：「我返去睇咗，原來影咗我屋企人，所以我要交代一下。嗰時係聖誕節，自己儲咗啲錢，媽咪見美國樓價跌，就叫我唔好擺啲錢喺度，用嚟買樓投資，我哋有睇，不過無買到，因為我唔想繼父咁大壓力，於是我買咗平啲嘅畀佢哋收租，等繼父可以唔使工作。（你自己出錢買？）係，我做咗10年嘢，算係top top哋嘅model，都儲到錢。（Leon有無同你夾份？）無，係我買畀我屋企人嘅，我唔係嗰啲要人送嘢嚟氹我嘅女仔。（咁Leon有無津貼你？）冇。（畀家用呢？）佢係我老公，佢好好，有照顧我，不過我自己都有工作。（如果Leon送樓畀你會唔會接受？）我諗唔會，我都唔需要佢送，咁樣我會覺得自己好無用，自己有能力買到仲開心。」

熊黛林靠自己搬家

Gaile有天王老公照顧，還有多餘私己錢來孝順父母，認真幸福；但據知同是「天王嫂」但地位未獲確認的Lynn將搬到七百多呎的新居入住，但只租非買，沒有另一半照顧惟有靠自己了。

文：名人組