羅家英惡菌致嘴歪諗過收山
羅家英日前凌晨時分於微博透露身體出現小問題，要暫停發微博，其後又發了一條微博「貝爾氏麻痹Bell's Palsy」，內裏詳細解釋該病的症狀與治療方法，羅家英更透露抵抗力變差，令感冒菌入侵第七神經線，因而引發該病。據知患上該病的病者，一邊臉部肌肉會喪失功能。
早前與太太汪明荃遠赴多倫多演出的他，昨日傍晚時分結束行程返港，坐了十多小時飛機的家英哥略見疲態，阿姐透露家英哥因感冒菌影響第七條神經線，更謂︰「當時發現佢大細眼，即刻打返香港問醫生，醫生建議去急症室檢查，佢就話冇咩嘢，係隻眼有啲澀，不過個病都可大可小，我都擔心，因為唔知咩事。」
現場所見，家英嘴部有少許歪，但他卻表示待翌日才到專科求診，問阿姐是否悉心照料？他笑謂︰「佢都好錫我，不過我唔休息得耐，之後要去山東登台，依家係左眼有啲合唔埋，當時係有一刻諗過會唔會隨時收山囉！」