撰文：賢

生活助理

較早前，內地有公司發出明確指示，要員工唔可以上熱爆網絡嘅交友網站facebook，因為呢個網站有大量可以令人上癮嘅遊戲，例如一個有關經營農莊嘅遊戲就搞到全民紛紛投入農耕樂，仲四圍走去偷菜添！不過，禁還禁，其實員工之所以成日上網玩遊戲，原因根本上就係因為佢哋太得閒，就好似唔少內地企業嘅員工一樣，有時只要運用上晝嘅兩三個鐘，就可以完成一日嘅工作，剩番嘅時間就得閒過頭囉！

就係因為咁，內地網上就出現咗一種自稱為生活助理嘅職業。呢類生活助理唔少都有正職，因為平時返工嘅時候太多空閒時間，所以就決定創業，用多餘時間幫其他大忙人手，透過互聯網嘅討論區同QQ就可以搵到佢哋幫手，而服務範圍包括代客接送、代客探親、送貨、做家務，甚至係落雨天送雨具等等，工作相當多元化。

商議價錢

消息指出，呢班生活助理好多都係80後嘅年輕人，當中以女仔為多，因為佢哋本身夠年輕夠幹勁，工作好快就可以完成，而且佢哋係女仔嘅關係，老闆多數會錫住，唔會畀太多工作佢哋做，空閒時間自然多到冇地方使啦！有部分更因為太多時間用，但係冇錢用，因而發表自己資料嘅時候，特別指明可以陪男人玩同陪酒，收費為每個鐘頭80蚊人仔，但係就屬於一般服務收費，而最重要嘅地方係最後補充嘅一行字寫住：「價錢可以再具體商量」，咁即係表示仲有一個特別服務價格啦！另外一方面，除咗按時間收費，仲有包月服務，千八蚊人仔就可以包足一個月，當然，呢個收費亦未包括特別服務，詳細價錢仲係要慢慢商量喇！