自然現象

遺精可以區分為「病理性」同埋「生理性」兩種。「病理性」方面，中醫認為係腎虛影響精關不固所致，而西醫就認為係性器官及其性腺產生炎症所致，至於「生理性」就指遺精係自然現象，當一隻水杯放滿水之後，就會瀉出一樣，毋須大驚小怪。

據調查所得，有九成嘅男性都試過遺精，最常見就係出現喺青春期，所以被指為「生理性」，唔需要接受治療，另外，「守齋」嘅情況太長，長時間冇進行性行為，亦會出現遺精，而每個月遺精一至四次，醫生話都算係正常範圍，但如果次數太多或精液有異樣，就要及早求醫。

四大誘因

如果撇除「病理性」因素，可能跟以下四種誘因有關，一就係性交次數未能滿足個人需要，精囊內嘅精液，惟有自行調節，將多餘嘅精液排出體外，出現咁情況，只要同伴侶溝通吓，多做幾次或者射精時唔好勒住勒住，都有幫助，二就係受劇烈運動或刺激食物影響，令神經系統處於興奮狀態，於是精液喺晚間會不自覺地排出體外，有時冬天男士食得補品多，亦會出現夢遺就係咁解。

第三就係瞓覺時，裸睡或者內衣太緊都有影響，第四就係伴侶喜歡一邊瞓覺，一邊撫摸，於是會喺睡夢中產生快感。

撰文：小德