全國人大常委會月底就政改訂下框架，一旦「落閘」料佔領中環行動一觸即發，財政司司長曾俊華（鬍鬚曾）最新網誌提到兩名即將重返校園嘅大學實習生，趁此提到自己大學時代見證過多次學生「佔領校長室」，直言理想同現實唔係好簡單對立喎。鬍鬚曾連實習生都不放過，趁此機會提到「佔領」行為，佢為政改真係可以去到好盡嘞！
鬍鬚曾最新網誌以「青春無悔」為題，提到七十年代初嘅美國，波士頓作為大學城嘅示威同集會係家常便飯，「佔領」抗爭模式當年非新鮮事，又話其中兩年有大規模嘅示威運動，幾乎癱瘓學校運作添。
鬍鬚曾其後提到，年輕時曾相信理想同現實係兩條路抉擇，以為係黑白分明，但其實決意堅持二元對立路線，無論係站喺道德高地，批評另一方放棄原則且唯利是圖，還是堅持現實，指責對方不切實際，其實大部分情況都係「為拗而拗」，因此呼籲年輕人放開懷抱認識世界喎。