撰文：小德

元祖巨乳

講番細川典江，佢喺九十年代，真係紅到發紫，可以話係水着界嘅一姐，擁有90cm嘅無敵巨乳，當時簡直少見，大家試諗諗，35吋巨胸再配23吋小蠻腰，再着上超性感三點式泳衣，真係睇見都流晒鼻血，所以細川一出道，就人氣爆晒燈，好快更轉戰藝能界，十幾年嚟努力不懈，喺藝能界都有一定知名度，成為唔少水着妹嘅目標，更被喻為水着界嘅「元祖巨乳」。

屈指一算細川典江今年都38歲，嫁人息影咗兩年左右，但最近喺網上竟有傳言話佢準備推出「裸體寫真集」，唔通巨乳復活？但都唔使去到盡，要裸體嚟拍寫真，於是翻查資料，原來細川被一場金融風暴，搞到乜都冇晒。

全裸搏盡

呢位金融風暴嘅受害者，喺娛樂圈打滾到36歲，先至決定息影結婚，其丈夫一定係千挑萬選嘅社會精英，據資料所知細川嘅丈夫係從事房地產多年嘅大老闆，可以話釣得金龜婿，從此做少奶奶享福，婚後更生咗一個仔。原本相夫教子，不知幾爽，點知舊年金融風暴，令丈夫生意一落千丈，據稱細川亦將畢生積蓄拎出嚟支持丈夫，可惜都係捱唔住，最後更宣布破產，佢老公更申請離婚。

細川一夜間失去一切，但不怨天怨命，馬上搵番以前嘅經理人準備工作，但要復出就要一鳴驚人，於是就接拍裸體寫真，希望可以東山再起。咁有計劃，再一次證明胸大未必冇腦，相信細川一定可以成功復出再闖一番事業。