政情：李慧琼不知喬寶寶是誰
尋日嘅區議會（第二）功能組別區議會議席論壇有喬寶寶「出現」，可惜民建聯李慧琼唔知喬寶寶係邊個。
話說尋日嘅超級議席論壇就有一個「假如我是……」嘅環節，畀候選人輕輕鬆鬆角色扮演，緩衝一下唇槍舌劍嘅氣氛，其中一條題目要求候選人代入印度裔演員喬寶寶，安撫一下佢嗰個對國民教育感到好迷惘嘅囝囝，點知抽到呢條題目嘅民建聯李慧琼（Starry）竟然唔知喬寶寶係邊個。不過講到國民教育，Starry唔使理喬寶寶係邊個啦，只要輕輕撳個play掣，就即刻七情上面滔滔不絕苦口婆心咁話，仔呀仔呀，其實香港好開放，國民教育仲有三年諮詢期，仲話放得心肝椗喺學校會好信任老師喎！
另外有人就爆民協馮檢基（KK）最新嘅花名係「民主秦始皇」，點解？因為KK霸住主席位，唔畀新人上位，又要黨友群星拱照佢選超級議席喎。搞到KK聽到即刻反擊話自己已經五年無做主席，技窮之時仲絕地反擊嚴詞指摘對方「失實聲明」添！