問：內地嘅夜總會房內，會提供DJ幫點歌同執頭執尾。雖然有人服侍感覺幾好，但有時唔係咁想佢喺度，費事佢睇住我哋同囡囡玩咁尷尬，咪同經理講唔要DJ，點知埋單時DJ錢照計！又有次去唱K，竟然有兩個DJ，而我哋只係得嗰四個男人，加埋囡囡只不過八個人，都唔使兩個DJ咁多。不過又擔心趕佢哋走，仍然要收錢，最終都係留番佢哋喺度。其實內地夜總會嘅DJ係咪可以唔要，同埋係咪一定要畀DJ錢呢？
答：內地嘅夜總會好多都有DJ駐房，每間房都會有一個，就算你唔要，埋單都係要收錢，價錢就要睇吓嗰個場大唔大，每位DJ收費從一百至兩百不等。如果有兩個DJ嘅話，大可同經理講要一個就得，通常都冇問題，收費當要計番一個DJ價。有人亦試過坐兩個DJ喺度，但只係收一個DJ價。不過，如果你入房後冇即時同經理講嘅話，埋單就要畀人硬屈兩個DJ價喇！
撰文：阿豪