作為一個打工仔，要搵一份合乎自己興趣嘅工作談可容易？雖然有難度，但係又唔代表冇可能嘅，好似呢次訪問嘅兩位美少女咁，天生有極強嘅表演欲，於是決心由沉悶嘅Sales工作抽身而出，進入多姿多采嘅酒吧界，變身成為一個性感Dancer。
撰文：娟娟 （相片由讀者浪子提供）
寓工作於娛樂
今年二十歲出頭嘅瑪姬，與十九歲嘅小楠，兩人本身同樣喺深圳一間服裝店做Sales，一次偶然機會，令佢哋完全脫離呢種枯燥嘅工作，事關佢哋已經成為寶安區「No.×9」酒吧嘅駐場Dancer，家吓呢份職業不但人工高啲，更讓佢哋搵到人生樂趣。
瑪姬同小楠之所以會嚟酒吧做Dancer，最大原因係佢哋本身都好鍾意跳舞，以前做Sales嘅時候，佢哋就會落吧同班朋友一齊玩，有時玩得High得滯，一跳就兩、三小時，搞到翌日返工好似喪屍咁。瑪姬表示：「反正自己鍾意跳舞，咪索性喺酒吧工作囉，寓工作於娛樂嘛！」咁都啱嘅，既然咁鍾意跳舞，又鍾意蒲吧，返酒吧的確係明智嘅選擇。
不暴露有原因
唔知做咗酒吧Dancer之後，兩位美少女喺生活上又有乜嘢轉變呢？小楠就話：「以前一齊落吧玩嘅朋友可能得三五知己，但係依家就多咗好多！」
點解會多咗朋友呢？小楠笑笑口咁話：「因為我工作嘅酒吧入面每晚都人山人海，要識朋友又有幾難呢？自從做咗Dancer之後，我更發現呢分工作的確好有意義，事關當我盡情舞動身軀時，能夠帶動觀眾情緒，令佢哋興奮起嚟，甚至將整間酒吧嘅氣氛都能大大提升，讓客人都能忘卻所有不快，開開心心咁玩番晚。」
據知，好多內地Dancer都會穿着一啲性感舞衣去表演，但係佢哋介唔介意露肉呢？瑪姬就話：「其實我以前都鍾意着Bra top跳舞，之不過呢排肥咗好多，肚腩仔走晒出嚟，所以唔敢着得太過性感，免得自暴其短，畀人笑就唔好啦！」晚晚跳舞都會肥咗，睇嚟兩個妹妹仔應該幾大食吓！