俗語話，食得唔好嘥。曾蔭權深諳箇中道理，否則唔會傍住富豪黐飲黐食，更加唔會知法犯法帶頭僭建。特區之首其身不正咯喎，其他人有樣學樣，結果咪搞到地霸橫行，僭建氾濫囉。
立法會帳目委員會尋日討論早排審計報告揭發嘅非法霸佔官地問題，議員群起攻之，怒轟當局有法不依，執法不嚴。就以元朗大棠荔枝山莊為例吖，經營者霸佔官地長達十八年，地政總署竟然視而不見，直到審計署踢爆先至如夢初醒，急急做騷派人清拆。
地政總署署長譚贛蘭話喎，今次事件係個別職員不按本子辦事所致，署方○六年拒絕山莊短期租約申請後，負責嘅職員冇按指引將個案轉交土地管制組跟進，直到去年山莊再提出申請，事情至曝光，強調係個別事件云云。而自認「好打得」嘅發展局局長林鄭月娥仲好笑，指外界要求局方投放大量資源去巡查霸佔官地不切實際，公眾有責任監察，佢仲話唔應該以檢控數字去衡量政府工作成效喎。
嗱，呢啲咪就係狡辯囉，一個卸責畀個別職員，一個就將責任推畀公眾，總之乜都唔關佢哋事。係呢，既然係咁，納稅人仲使乜養咁多官員？
講開又講，懶惰官僚食嘢唔做嘢，又點止處理霸佔官地失職吖，處理僭建問題更加不知所謂。呢，立法會議員兼東亞銀行主席李國寶山頂豪宅僭建千呎天台屋，屋宇署前年已接獲市民舉報，經調查後去年二月向李國寶發出清拆令，點知之後就關人個關，完全冇再跟進，直至本報踢爆，屋宇署先向李國寶嘅僭建物業釘契，足足遲咗年幾。更離奇嘅係，屋宇署嘅清拆令竟然寫錯地段號碼，而且錯足一年都冇更改。大家咪以為呢啲係小事吖，根據法例，任何人冇合理辯解而沒有遵從清拆令，可處罰款二十萬元及監禁一年㗎。嗱，呢單嘢點處理先？
係人都知，李國寶係煲呔曾死黨，被視為「曾朋友」，屋宇署執法放軟手腳，如果話當中冇蠱惑，你信唔信吖？唉，煲呔曾政府冇嘢叻，最叻就係官官相衞，官商勾結，豈有此理！
講到尾，香港之所以地霸橫行，僭建氾濫，皆因煲呔曾其身不正，唐英年、鄭經翰、李國寶唔執輸，「曾朋友僭建營」圍威喂，歪風吹襲，又點可能唔烏煙瘴氣吖。林鄭月娥指針對霸佔官地嘅罰款已不合時宜，有必要盡快檢討，其實，計功夫茶話齋，霸佔官地嘅罰款固然要檢討，但更需要檢討係已經爛透嘅官僚制度！