店小二顏樂楓 賣出人情味

位處街市熟食檔，「添仔蝦餃」清晨時分已吸引不少食客到來，尤其以年長茶客居多。人稱「B哥」的顏爸爸，每日天未光就要為開舖作準備。疫情關係，他坦言生意亦受影響，鼓勵其堅持下去的，除了是對做餐飲、用心做好點心的熱誠外，還有就是與客人間的關係：「呢啲地方唔算有咩特別，只不過係食一種街坊嘅味道。」

同熟客鬥快計茶錢

說話直爽的顏爸爸繼續說：「好似之前禁堂食，有食客話點都要上嚟飲茶，搞到我好難做好難為情，佢話：『幫襯咁多年，開壺茶都唔得？』我話唔係我，係政府話唔得。」回憶起這段哭笑不得的經歷，顏爸爸亦忍俊不禁。身為家中長子的顏樂楓，平日忙於比賽及訓練之餘，閒時亦會抽空到檔口幫手，對點心店的人情味絕不陌生：「初初嚟幫手，連價錢都唔知，好多上咗年紀嘅街坊，日日嚟飲茶，實清楚過我，佢哋會教番我做嘢，同我鬥快計茶錢，係好好玩。」

無論收銀定落單，「光頭」凡事一腳踢。	放大圖片	「光頭」（左）將壓力化為動力。

上菜收銀忙過掃蕩中場

招呼客人、上菜、收銀、做樓面，客人一多的時候，「光頭」隨時忙過為理文掃蕩中場。雖然自小跟隨父母出入茶樓，但他笑言自己廚藝不精，廚房的活兒，還是讓給爸爸主理。「光頭」去年向女友求婚成功，踏入人生新階段，顏爸爸亦不忘叮囑他要「學煮兩味」，對此「光頭」回應道：「始終我都需要將大部分時間擺喺足球度，要學一樣嘢如果唔學到最後，我寧願唔學住。」

近年理文迅速冒起，作為球隊副隊長的「光頭」，人氣亦隨之急升，他透露除了獲茶客主動攀談傾波經之外，點心舖也吸引不少理文球迷慕名而來，顏爸爸笑言「光頭」已成為店內的生招牌：「講真，佢（顏樂楓）肯落嚟幫手，我生意一定係多咗，啲叔叔伯伯都會問我個仔幾時出場，叫埋佢哋去睇波。」忙碌過後，顏爸爸最愛的消遣娛樂，還是入場看「光頭」比賽。現場觀戰的過程，亦使他能將工作的煩惱拋諸腦後：「成個人即刻開心晒！」

放大圖片	茹子楠（左）大讚點心大件夾抵食！

兩父子同對專業執着

理文今季奪冠目標明確，「光頭」自然要肩負更大責任，他承認已經切身感受到對成績要求的壓力，但同時表示對這一切毫不抗拒：「壓力，我覺得點都有嘅，但作為職業球員，如果承受唔到壓力，就唔合格啦。我都好享受有呢種壓力，因為呢個係一個好明顯嘅訊息，畀到自己同所有隊友，要交出成績，如果做唔到，就要諗清楚問題喺邊度。我好希望每一年都有爭標能力，畀人知道我哋係嚟爭標，唔單只係嚟完成球季，同只係踢得好。」兩代人拚搏的舞台截然不同，但顏氏父子各自對專業的執着，均有着彼此的影子。