不丹足總「派糖」對抗疫境

各地球壇畀新冠肺炎疫情搞到亂晒,不丹嘅聯賽同樣無可幸免遭受重創,但不丹足總日前就宣布「派糖」,為各支正處於水深火熱嘅國內球隊紓困,等當地聯賽可以繼續進行。

一個地區嘅足球發展,同當地聯賽息息相關,無論係足球水平嘅提升,定係各間球會嘅可持續發展,都離唔開一個健全嘅聯賽。作為不丹足總嘅主要收入來源,不丹頂級聯賽吸引咗唔少資金同埋贊助,一場疫情假如令聯賽踢唔成,唔只各支參賽隊伍大鑊,足總都會好傷,對當地足球發展嚟講,更加會帶嚟災難性後果。

每隊20萬 逾千職球員受惠

不丹足總非常有大局觀,意識到聯賽正常運作嘅重要性,同埋疫情下各支球隊收入大受打擊嘅問題,就向8支當地頂級聯賽球隊,每隊派發200萬努扎姆(約20萬港元)抗疫援助金,幫助各隊繼續運作;另外上季降班嘅4支球隊同其他個別球會,都獲得一定資助。據不丹足總表示,今次援助金除咗用嚟支付球員同教練薪酬外,同時亦承擔起球證同比賽工作人員嘅人工,受資助人數超過1,000人,畀啱啱喺8月頭開咧嘅當地頂級聯賽,可以踢埋落去。

無論係疫情爆發嘅規模,抑或係球圈嘅現狀,不丹同香港當然不盡相同,但要維護聯賽正常運作,從而保證當地足球整體發展嘅道理,應該唔會有太大差別。至於點樣去實行,世界各地已經畀咗好多唔同嘅答案,希望港超聯當前嘅種種問問題,一律可以盡快解決得到。

震震