施丹偶像施利斯高域揸弗 傑志誓重霸港超

為教練團帶來經驗

新季「藍鳥」出現多張新臉孔，教練團方面，除了施利斯高域外，青訓教練金東進將會接替高尼路出任一隊助理教練（防守），亦聘請了前越南國家隊體能教練裴鋕垣（Bae Ji-won）擔任體能教練，還邀得在港征戰多年的尹東憲加入教練團。至於球員方面有洛迪古斯、基爾頓和蘇沙加盟，同時將於短期內簽入一名亞援。此外，即將完成學業的安永佳將於11月歸隊。至於今季新增的1個國援名額方面，來自廣州恒大的中堅楊朝輝目前正隨球隊試腳。

新季主帥一職由曾執教波斯尼亞國家隊的施利斯高域出任，伍健盼Blaz能協助「朱Sir」成長：「過去我哋搵歐洲教練例如：甘巴爾，佢嚟自薦之前其實係一個好成功嘅青訓教練，之後佢同球隊一齊成長；摩連拿，嚟香港之前都唔係好多執教經驗。但係今次我哋諗住搵一個年紀成熟少少、經驗多啲嘅總教練，因為我哋希望有一個人有好多足球知識、經驗，可以教畀我哋嘅教練團，特別係『朱Sir』，希望佢將來做番總教練嘅時候，已經從Blaz身上學多咗嘢。」

傑志雨中開操，淋不熄球員鬥志。	傑志新兵 蘇沙（中）	傑志於記招展示新季主場球衣，球迷不容錯過。

朱Sir推動年輕球員接棒

伍健亦透露原任主教練朱志光新季將專注青訓工作：「『朱Sir』過去3年攞咗8個錦標，呢啲成績令人驕傲，但『朱Sir』分身乏術。其實依家好多年輕球員好似鄭展龍、羅梓駿都係『朱Sir』嘅學生，我哋有個職責，就係要幫呢班就快喺職業足球發光發熱嘅球員去改善身體質素、技術，令到佢哋盡快踢入一隊。傑志成日畀球迷話我哋好多入籍兵、唔夠本地年輕球員，但係年輕球員始終都係年輕，要佢哋能力成熟先可以畀佢哋打。嚟緊一年我哋想『朱Sir』幫球會諗一諗，推前一大步，所以佢唔會教一隊，但佢會喺旁邊作為一個足球總監去做呢個工作。我哋最關注係年輕球員點樣去變成一隊成員，呢段時間『朱Sir』會集中精神去諗吓，我哋喺呢一方面點樣向前邁進。」

球員時代一臉大鬍子、獲球王施丹視為偶像的施利斯高域，以堅定的語氣表示：「我一定會以實幹同有效嘅方法，帶領傑志重奪聯賽冠軍！一定會！」

圖：何彥霆、文：陳焌鏗