組軍方向分歧和平分手 堅Sir離和富大埔
隨着周三（26日）亞協盃分組賽作客與主隊航源踢成1比1，和富大埔亦正式完成今個球季，然而主帥「堅Sir」李志堅賽後宣布，決定離開「綠戰士」轉投另一港超球隊。和富大埔足主蔡尚圻（Gary）強調與「堅Sir」一直合作愉快，彼此並無不和，絕對是和平分手。
「堅Sir」周三一仗後強調，其離隊的決定並非如傳聞般「精心部署」，而是在剛過去的周日（23日）才正式決定，他說︰「事實上我都希望可以留喺大埔，到咗啱啱嗰個星期日先決定離開，因為大家嘅方向唔同，依家球會嘅贊助商會採取其他方針，我哋傾咗好耐，大家都未能保持好似上季嘅情況，呢個係我決定走嘅主要原因。其實事情唔係外間所講嘅咁早發生，至於自己嘅去向就有待新球會公布，事實一切事情都喺和平氣氛下發生，呢3年好多謝大埔畀咗好多機會我。」對於「堅Sir」的去向，坊間都有不少傳聞，先有接替朱志光執掌傑志，再有帶兵過檔東方龍獅，惟相關球會一直未有任何回應；同樣「綠戰士」新帥誰屬，亦有不少推測，包括上季執教凱景的前「最佳教練」馮凱文。
足主蔡尚圻︰盼培育更多年輕球員
至於Gary就澄清，他與「堅Sir」一直合作愉快，而且尚未跟任何教練簽約︰「我好肯定同大家講喺禮拜日（23日）之前，從來冇人簽過任何約，包括我同任何教練所簽嘅合約。我同『堅Sir』嘅關係，由頭到尾，到依家呢一刻都一樣咁好，只不過我哋有啲嘢到咗一個位討論咗好耐。佢唯一呃過我嘅，就係季前講話未必贏到聯賽冠軍！」
Gary補充謂，球隊來季方針希望可以培育更多年輕球員︰「和富大埔作為一支地區球隊，方針係一路去培育本土嘅年輕球員，而之前嘅年輕球員，依家已經成為香港最當打嘅一班球員。大埔贏咗聯賽冠軍之後，外界對我哋有好多想法，好似豪門咁去追逐更多冠軍，但係我哋嘅宗旨係想培育更多年輕球員。」
艾華度：尊重合約精神留隊
「堅Sir」離隊，大埔一眾球員的去向亦引來外界關注，其中巴西守衞艾華度則透露，現時跟球會仍有合約在身，並會履行合約精神留隊：「我目前同大埔仲有1年合約，我會尊重呢份合約，只要大埔需要我，我就會留低。」