曾至孝再次起飛
「每個人都有高低潮，經歷過之後，就去反省，再做得更加好。」現年29歲的曾至孝，2017年10月操練中傷及十字韌帶，經歷了約一年的治理，終在今季季初復出，並於菁英盃中重新出發。「阿孝」今年初從東方龍獅外借加盟香港飛馬，期望憑藉在飛馬的上陣機會，再次證明自己的能力！
正值當打之年的「阿孝」，上季僅為東方龍獅上陣過一場比賽，回想起當日受傷一刻的心情，他坦言不忿：「因為每日練波都好認真，好珍惜踢波嘅時間，好想做好自己，每樣嘢都比之前一季做得更加好，好想證明自己，點知季初就搞成咁，真係非常唔開心。」
當日的傷患到今天已完全康復，白白錯失1年光陰，「阿孝」誓言追回被「偷走」的時光：「以前年輕時好多幻想，依家反而想做番好自己先，飛馬有機會畀我就做好自己，建立番自己畀人嘅感覺先。始終成季冇踢，足球變得好快，一季冇踢就可能有個新嘅人，都可能唔記得我係邊個。」他續說：「依家個心態會比之前更加堅定，因為受過傷，會更加珍惜喺球場嘅時間，鬥心會更加強。」
前鋒變後衞 望重溫士哥夢
「阿孝」初出道時司職前鋒，縱然他已轉任後衞多年，但仍希望重溫昔日的美夢：「初出道頭幾年就有入過波，之後好耐都冇入過波了。」問及「阿孝」上次入球的年份時，他笑說：「唔記得啦，呢啲『咸豐』年嘅嘢，無晒印象！」曾獲前港隊主教練摩力克提攜的「阿孝」，坦言渴望再次代表香港：「如果自己表現夠好，而人哋又認同你嘅話，希望有機會喺港隊表現自己。以前你踢完港隊比賽人哋都唔知，依家個氣氛好咗，球員落到場都會High啲、亢奮啲，自己都好想有呢種感覺。」
為老竇揀選「38」冧巴
轉投香港飛馬後，「阿孝」選擇了38號球衣，原來箇中有大玄機：「其實係以前老竇鍾意着38號，可能佢以前都鍾意踢波，但係佢冇踢落去，所以依家我就着住佢個冧巴，帶埋佢上場！」
曾至孝Profile
出生日期：1990年1月12日
身高：1米83
體重：75公斤
位置：中場、左後衞、中堅
曾效力球隊：香港09、華家堡、東方、愉園、傑志、大中、港菁、東方龍獅
現效力球隊：香港飛馬
球衣號碼：38
圖／文：陳焌鏗