家有愛犬Cool魔變暖男

從外表上看，球迷也許會覺得曾至孝為人冷酷「Cool到極點」，但回到家中，「阿孝」便化身暖男，為家中柴犬「Momo」、「Vivi」和鬆獅狗「爽爽」送上溫暖！訪問期間，一談到3隻愛犬，「阿孝」便打從心底裏笑出來：「柴犬細個好曳，記得練完波返到屋企，成間屋都好似打完仗咁。佢好勁o架，用個籠都冇用，初時佢會咬爛個籠，但係後尾佢醒目到用人嘅方法去開個籠。」

講難忘「狗經」滔滔不絕

至於關於愛犬的最難忘經歷，「阿孝」滔滔不絕地笑說：「Momo好少全速跑，但係有次夜晚放狗，點知遇到幾隻都柏文，然後就畀嗰幾隻都柏文追，跟住先見到佢原來跑得咁快，我完全追佢唔到，好似啲獅子咁儲埋儲埋淨係用一段。去到咁上下，見到佢喺個位等我，嗰次先感覺到佢好需要我咁，因為佢本身好有性格，平時唔會舔你、嗲你，但係嗰次抱佢真係覺得佢好似自己個仔咁。」