唔怕上車難 轉籍 尋根 杜敬謙真．香港飛魚

在香港出生的Kenneth自兩歲起便隨父母移民澳洲，卻一直對香港有情意結：「我喺屋企一直講廣東話，亦有留意港隊嘅表現，代表澳洲比賽時亦有搵港將傾偈，因為我知道呢度係我嘅根。」

請教女友學好廣東話

直至2016年Kenneth選擇轉籍香港，尋找游泳事業的第二個機會，他笑言於港認識的女友Kelly「應記一功」，因為來港後最難適應的廣東話，亦是向女友請教，現時雖然仍半鹹半淡，不過他堅持學習：「因為平時要用囉！我知我係一個香港人，就要識寫同講廣東話。」

杜敬謙愛逼地鐵歎蝦餃燒賣。	杜敬謙今屆亞運攞牌信心爆燈。	「大師姐」施幸余（前）希望後起之秀成功接棒。（袁志浩攝）

愛逼地鐵歎蝦餃燒賣

外界稱呼Kenneth為「入籍飛魚」，「入籍」雖無褒貶之分，可是他仍希望大眾換上「香港」一詞：「兩年嚟都喺香港練習，我唔會返去澳洲或者美國訓練，依家香港先係我屋企，我已經計劃留喺度生活。」其實Kenneth的生活與一般港人無異，閒時與女友於商場行街食飯睇戲：「呢度樣樣嘢都方便，周圍去有地鐵巴士，唔使好似澳洲咁要揸車。體院有時早餐會有蝦餃燒賣，我好鍾意食，一諗起就會自動起身。」

看似毫無煩惱，不過原來Kenneth與大部分人一樣，最困擾是土地問題。「『上車』即係咩？……哦！其實我都擔心呢樣嘢，澳洲悉尼啲樓已經好貴，但香港仲貴，希望呢幾年努力去游好啲水，遲幾年夠錢喺香港買樓啦！」

代表港隊前需過一年「冷靜期」，當時他每日重複訓練，卻被禁止出外參加大賽，有苦自己知：「練習有啲悶，游水唔係每次跳入水就好玩，好多嘢好辛苦。但每日都說服自己，只要忍一陣就可以長遠為香港比賽，諗住準備得好就會游快啲，呢個犧牲係值得。」

「亞運？應該贏到牌」

今屆亞運這位男神會出戰50米自、100米自、200米混及接力賽，儘管在世大運及全運會都在個人項目與獎牌無緣，他仍堅持信念：「我明白亞運對香港人意義重大，相信自己可以游到最好成績，呢個成績應該贏到牌！」除了為港爭取佳績，Kenneth亦希望為下一代帶來啟發：「我只係個好普通嘅人，但游得好破咗紀錄，啟發唔少細路仔嘅游泳夢，好開心可以做別人嘅榜樣！」

13港績未算無敵 「仲可以快啲！」

「兩件港隊衫有白有藍，揀邊件着好？呢件新啲，幫我影張相。」「影半身係咪唔使換鞋？咁其實褲都可以唔使着，哈哈！」如果你以為13項香港紀錄保持者，總會終日為刻苦練習練得眉頭緊皺，那便大錯特錯了。訪問當日Kenneth表現活潑，對攝影道具亦感興趣，絕對是笑容陽光的爆肌大男孩。

Kenneth兩年間已多次刷新港績，現時保持共13項長、短池香港紀錄，項目更橫跨自由泳、蛙泳、蝶泳及四式混合泳，無敵最寂寞，還有甚麼挑戰？「上年成績我知係快，不過呢13個紀錄，我每個都可以再游好啲。」可愛得來更自信滿滿！

施幸余：幫後輩緊要過攞牌

昨日在維多利亞公園游泳池會見傳媒的香港游泳代表隊，將以老帶新出戰雅加達亞運。近年開始兼任教練，「大師姐」施幸余表示最希望幫助「小飛魚」成長。

港隊最龐大陣容游亞運

港泳隊將派出17男15女歷來最龐大陣容出戰今屆亞運，當中接近一半代表首次出戰這項賽事。四朝元老、現年30歲的「施余」過去3屆均獲接力賽銅牌，她明言希望今年是最後一屆，目標不是追求獎牌：「如果需要我出戰5屆則證明小將不能上位，現時主要希望幫到一班小將。始終自己進步空間不及小將，我亦十分期待他們的表現。」近年逐漸轉型成為教練，她最想後起之秀可以接棒：「訓練過後我身份就是教練，發現她們還有很大進步空間，特別在心態上，太注重勝負，過分與他人比較，希望灌輸正確觀念及知識。」

她坦言運動員的心理健康問題特別重要，在競爭激烈環境中，年輕一輩的抗壓能力可能不足：「緊張是好事，但不要將其變成壓力，需要紓壓方法。我們經驗較足的一輩抗壓能力較高，若小將們出現情緒問題可向我們傾訴。」泳隊亦會有心理學家隨隊出發，在各方面都有資源配合下，「小飛魚」們可望在未來接棒，甚至超越師兄師姐的成就。

杜敬謙 Kenneth

·年齡：26歲

·強項：自由泳、蛙泳、蝶泳、四式混合泳

威水史：

2017游泳短池世界盃

·俄羅斯站100米混銅牌

·德國站200米混銅牌

·荷蘭站100米混銀牌

·香港站100米混銀牌、200米混銀牌、100米自銅牌

·新加坡站100米混、200米混銅牌

第13屆全國運動會

·男子4×100米自接力銀牌

圖：王藝霖/文：袁志浩