梁諾恆 梁冠聰Brother情深
菁英盃準決賽今個周末開戰，衞冕的和富大埔迎戰香港飛馬，梁冠聰、梁諾恆兩兄弟將繼聯賽首循環後再度交手。由小時候爭打遊戲機，到現在爭冠軍，兩人明言會以球隊為先，目標入決賽的同時，亦齊聲表示會繼續互相扶持，盡顯手足情深一面。
聯賽首循環香港飛馬對和富大埔，是兩兄弟職業生涯首次於場上對壘，結果「細佬」梁諾恆射入世界波，協助香港飛馬反勝和富大埔。「細佬」稱感覺新鮮：「其實都好平靜，比較少類似嘅經驗，以前可能一齊贏、一齊輸，嗰次感覺就比較特別。」
雖然現時各為其主，「大佬」梁冠聰表明兩兄弟會繼續互相扶持：「雖然我哋依家唔係同一隊波，但有時佢會嚟睇我比賽，我睇佢比賽嘅時候，都會講番佢呢樣做得幾好，可以繼續喎，但呢樣做得唔好就要改善，以朋友嘅角色去話番畀佢聽點樣可以做好啲。」
菁英盃4強兄弟再鍊過
生活上同成長，兩兄弟學會互相欣賞。「大佬」坦言「細佬」心理質素較好：「我覺得有樣嘢佢比我強，就係佢面對逆境好快會適應得到，我好記得佢講過第一年去英國，個教練唔畀佢踢，佢就要證明畀個教練睇，你冇咗我係唔得嘅，當佢克服困難後，個人內心會變得更堅強。」
從小到大視哥哥為榜樣的梁諾恆，則感激「大佬」為他解決生活瑣事：「無論場內場外，哥哥經常幫我解決問題，令我可以好專注做鍾意做嘅事。佢嘅優點係個人踏實同唔怕蝕底，佢唔會驚做多，會幫埋人哋去做，足球路上我哋可能唔係最好技術嗰個，但一定係隊中最勤力嗰幾個。」
談到今屆菁英盃，「大佬」表示：「當然想衞冕，和富大埔上年攞咗菁英盃冠軍，雖然自己冇份，希望今年攞到自己第一個冠軍。」「細佬」亦不禮讓：「首先都係為球隊利益着想，一定想入決賽，依家球隊仲有兩個盃賽爭——菁英盃同足總盃，希望兩個盃賽都入到決賽，爸爸媽媽就最開心喇，因為菁英盃準決賽大埔對飛馬，點都有一隊入決賽。」
人生大事領先大佬做慣辦
雖然首循環不敵「細佬」，然而梁冠聰在人生大事上則遙遙領先，更於上年7月求婚成功，「細佬」表示「有辦睇」是好事：「呢方面輸吓都好嘅，其實自己都有諗過，但係最好哥哥搞咗先，因為我哋屋企都好大家族，籌備結婚好多嘢搞，有個辦畀我睇吓先，我遲啲就好做喇。哥哥由細到大都好似行出一條路畀我慢慢跟住，令我行得容易啲。哥哥嗰陣入選香港隊、踢區隊、出外比賽，有咗經驗後，我有咩唔明都可以問佢，因此幫咗我好多，自己個心都會定啲。」
本周賽程
4月18日（三）
亞冠盃分組賽
全北汽車（南韓） Vs 傑志
晚上8時
4月21日（六）
菁英盃4強
和富大埔 Vs 香港飛馬
旺角大球場
下午5時30分
$80、$30（特惠票）
4月22日（日）
中銀人壽香港超級聯賽
標準流浪 Vs R&F富力
深水埗運動場
下午2時30分
$80、$30（特惠票）
菁英盃4強
傑志 Vs 夢想ＦＣ
旺角大球場
下午5時30分
$80、$30（特惠票）
圖：何彥霆
文：陳焌鏗