搏盡2：4負清化「和哥」首演：球員100%付出
亞洲聯賽冠軍盃外圍賽第二圈，昨晚於旺角大球場上演，東方擺下擂台陣迎戰越南球隊清化。主場出擊的東方開賽初段一直強攻，更由勞高打開紀錄，惟之後先失12碼，易邊後更被黃廷松省入3粒，終在3,305名球迷入場下以2比4不敵清化，無緣躋身下一圈賽事。
今場為「和哥」李健和掌東方帥印後首仗，賽前誓言絕不留力，開賽初段球隊表現積極，一直於前場施壓，鞠盈智5分鐘左路角球開出，被前柱的吳煌盛化解。勞高11分鐘右路底線附近斬中，惟門前無人接應，攻勢告一段落。主隊連番攻門終於25分鐘修成正果，張健峰左路罰球開出，首嘗亞冠滋味的勞高門前一頂入網，為球隊打開紀錄。
不過，東方領先短短6分鐘便失守，新加盟的守衞井川祐輔門前犯手球，球證即時出示黃牌並直指12碼點。這個極刑由菲爾主射一抽掛網，為清化追成1比1平手。補時階段曾錦濤接應李康廉傳中，遠柱頂彈地波，同樣過不到陳寶玉十指關，兩軍踢成1比1完上半場。
勞高罰球中柱唔夠運
清化易邊後換入前鋒黃廷松加強火力，他一落場即錯失黃金機會，門前接應武明俊傳中惜「躂Q」被葉鴻輝救到。但這位前鋒隨即發威，分別於58分鐘及60分鐘接應黎文勝傳送，3分鐘內連入兩粒，拉開比數。主隊於63分鐘博得12碼，由洛迪古斯主射破網。其後於81分鐘得罰球機會，由勞高主射，可惜僅僅中柱。清化戰至補時階段再有黃廷松把握敵衞解圍不遠埋齋，為清化奠定4比2勝局，躋身下一圈賽事。
賽後「和哥」認為一眾球員表現積極：「雖然輸波，但起碼畀我見到球員無因為司徒文俊離職影響比賽心態，見到佢哋行出嚟都係好想贏番場，無奈對手實力真係強。今日我哋14個球員個個都Okay，唔理佢出場時間長短，個個都係100%付出！我相信球隊喺之後嘅比賽會更加強！」對於球隊3分鐘內慘失兩球，「和哥」表示：「無辦法，手球省落去，大家都唔想。對方反擊真係快，我哋有球員力追，但呢啲情況估唔到。球隊角球壓晒上去預咗有呢個情況，其實有機會追番，但踢波就係咁樣囉！」
．本周賽程．
高級組銀牌決賽
1月27日（六）
東方龍獅 Vs 陽光元朗
香港大球場
下午3時
$80、$30（特惠票）
中銀人壽香港超級聯賽
1月28日（日）
R&F富力 Vs 和富大埔
廣州燕子崗體育場
下午2時30分
$50
傑志 Vs 標準流浪
旺角大球場
下午2時30分
$150、$50（特惠票）
圖：袁志浩/文：胡恩晴