34歲文彼得致命復活

「你的樣子如何，你的日子卻未必如何。」靚仔如文彼得，轉型幕後本無憂出路，但見球隊陷危機，選擇挺身而出。是年輕人的悲哀，還是老兵打不死？「其實我都好矛盾，Keep住練會唔會阻住班後輩上位？教練（奇雲邦特）未見過我以前點踢波，純粹靠表現用人。如果你強如美斯，唔通唔出咩，但撫心自問，平時練波係畀6、7成，定付出100%？」操練後的「文總」聲音沙啞，投入程度比以前有增無減：「上過教練班後，見到球員細微動作錯咗好想糾正，以前踢波冇咁清楚鑽研。佢哋話我似足《西游記》羅家英，日哦夜哦好煩。」

好識諗考定一堆牌

恨鐵不成鋼，只因綠茵場上再不捨，亦要知道幾時要退。泰拳牌、健身教練牌、亞洲足協教練牌……未到30歲已為未來謀後路，一次練習斷腳退下火線，亦不致前路茫茫。「做球員始終要面對現實，之前練波後關節會痛，身體反應話我知差不多要退。剛開始轉型難免撞板，踢波只需聽從指示，行政工作就要顧及全隊感受，責任大好多，惟有邊做邊學。」由當打年代的「盯人專家」到退役後的行政領隊，「文總」不乏伯樂扶持，別人眼裏看似幸運，他卻自知要比別人付出更多。相比起昔日同齡隊友李志豪及陳偉豪，笑言「贏在靚仔」的Peter早在出道初年，已知成功需苦幹。

「佢兩個係『體院仔』，要人推薦先有機會考到，我連畀人推薦嘅機會都冇！技術唔夠好，惟有加強體能，以前邊有健身中心贊助咁幸福，惟有帶啞鈴落球場舉鐵，返到屋企再做Sit Up、掌上壓。呢啲力量訓練唔難，睇你有冇心做。」坐爆4萬人的歡呼聲他感受過；連名帶姓的指罵聲，他亦承受不少：「如果表現差，畀人話好正常；如果係惡意指罵，惟有正面啲諗，起碼人哋講得出你名，淨係叫你幾多號仔咪仲慘。」做不成IQ爆棚的天才，做個EQ與AQ兼備的凡人，也可創造不平凡旅途。