「神奇小子」曹星如號召力強勁，昨晚比賽唔止拳迷，仲有大班明星同埋體育界人士一齊入場！其中同Rex拍過廣告的曾江大讚呢位廣告拍檔：「Rex講過叫現場觀眾都要為佢對手拍掌，真係好有風度，無論輸贏都會支持佢！」
演藝界紅人Do姐鄭裕玲亦於臨近開賽在助手陪同下入場，由於賽事即將開始，現場熄晒燈，Do姐只能摸黑與曹星如見面。兩人甫見面立即來個抱抱，相當親切，Do姐向Rex送上祝福。在場邊觀戰的名人眾多，不能盡錄，計有任達華、李克勤、狄龍、蔡一智、張達明及谷德昭等等。
體育界方面，傑志主帥朱志光夫婦聯同一班球員、東方龍獅、南華都有入場，包括林志堅、林柱機同林恩許、陳文輝、梁振邦、英雄輝、鄭璟昊、曾錦濤一齊排排坐。至於和富大埔主帥「堅爸」李志堅，下晝成功帶隊殺入菁英盃決賽之後都着住「曹Tee」入場，真係堅‧有心！演藝界同體育界齊集，全城撐Rex！
至於全新設計兼300兼限量版打氣tee，觀眾入場全都湧到攤位搶購，無論是青少年男女，還是年紀較大的觀眾都對這件特別設計的打氣tee產生興趣！觀眾入場時亦獲派發場刊，製作十分精美。