現効力於德乙球會格雷特霍夫嘅林志堅，月薪超過20萬港元，呢個銀碼喺歐洲球壇係小數目，但對於香港球壇而言已經不得了，因此今次林志堅踩場，車仔足校一班青少年學員都非常興奮。其實現年24歲的林志堅僅比車仔足校U16學員年長幾歲，難得佢嚟「露兩手」，車仔職球員亦唔客氣，人人施展渾身解數，親身感受吓德國職業球員到底有幾「堅」。
車仔U16學員當中，有位識講德語嘅叫施萬德嘅德港混血兒，識講廣東話同德語，佢同志堅有傾有講，一邊鬥波，一邊問佢有乜門路去歐洲搵食。對於呢個問題，林志堅冇托手（月爭），仲即時做埋「職業輔導」添！
志堅話德國小學嘅體育堂硬性規定全部學生都要踢波，而佢因為表現標青，8歲就入咗漢堡訓練營，幾經努力入選漢堡青年軍，4年前獲提拔上一隊並於德甲登場，他說：「任何人都一樣，首先當然要努力練習，同時信念和意志力都很重要，我現時喺德乙比賽，但我堅信終有一日可以重返漢堡，再戰德甲。」
比林志堅高一個頭的施萬德持有特區護照，將來可以代表香港比賽，他說：「我每年都返德國探親，會以佢做榜樣，更希望將來可以喺德國落班，做第二個林志堅。」
文：黃兆崑