干地劈炮阿里基火速接手

意大利球壇帥位大風吹,率領祖雲達斯獲意甲3連冠嘅教練干地突然同球會提前解約,據悉雙方分手原因係干地不滿祖記計劃出售保羅普巴同維達爾兩大主力,但其實係佢有路數,就係接掌意大利國家隊帥印。前AC米蘭教練阿里基已受聘填補干地嘅空缺。兩隊死對頭依家「閉門一家親」,關係錯綜複雜。AC米蘭新帥恩沙基新官上任三把火,鐵腕治軍,揚言要打造「鐵甲兵團」問鼎錦標,加上一向語出驚人嘅捷克老帥施曼重出江湖,來季意甲肯定多事!

賣普巴維達爾成導火線

本來仲有1年合約在身嘅干地透過球會官方YouTube道別:「我宣布辭職,我已經證明咗自己能夠喺壓力下成為勝利者。對於未來,我會喺聽日(今日)再考慮。」當地傳媒指干地同會方喺轉會政策有分歧,導火線係佢講明想買阿歷斯山齊士,但會方冇跟進,結果A山被阿仙奴捷足先登;加上祖記曾承諾唔賣智利中場維達爾,但卻同曼聯傾轉會,甚至會賣埋法國中場保羅普巴畀車仔,擺明當干地透明。

不過另有消息話,干地唔撈係因為意大利喺世盃分組賽出局,柏蘭迪利辭職,佢想過下國家隊主帥癮。祖雲達斯迅速請到阿里基接手,今日接掌帥印,將會簽約兩年。不過,祖記大腦派路3年前正正係畀阿里基逼走,唔知會否影響合作關係。

恩沙基軍訓式操AC

AC米蘭開操,新帥恩沙基採用軍訓式管理球隊,勒令球員集訓期間必須於早上7點45分起身,半個鐘後到達更衣室,9點開始操練,遲到就會被罰。亦唔准喺更衣室同食飯時使用手機,又必須跟隨球會提供嘅食譜飲食。呢位少帥話球隊近日進行高強度操練,要激發球員鬥志,為AC注入爭標決心,要好似「鐵甲兵團」咁堅強,打破祖記壟斷局面。

另外,67歲嘅施曼上年年初被羅馬炒魷後,一度打算退休,但改變主意,成為卡利亞里新教練。佢曾經大爆祖記球員濫藥,又話意大利球圈人士小器,打壓曾於世盃踢走意大利嘅阿根廷球王馬納當拿及南韓前鋒安貞桓,佢老人家來季隨時又有金句出爐。

干地Profile

年齡:44歲

國籍:意大利

執教威水史

‧意甲冠軍3次

‧上季帶領祖記以102分奪冠,締造歐洲5大聯賽史上最高得分紀錄。

‧上季協助祖記以33勝3和2負,打破國際米蘭喺06至07球季創造嘅30場單季最多勝仗紀錄。

‧上季主場19戰全勝獲57分,超越05至06球季嘅AC米蘭(55分),創造意甲史上單季主場最高得分紀錄。