馬刺湖人火併月黑風高
湖人及馬刺兩支傳統勁旅於香港時間周一凌晨舉行的季後賽西岸首圈正面交鋒，兩軍都受到黑氣籠罩。「紫金兵團」主帥迪安東尼（Mike D'Antoni）遇着馬刺教頭普波維治（Gregg Popovich）例牌「冇運行」；而馬刺陣營亦有頂級黑仔麥基迪（Tracy McGrady），呢舖黑鬥黑肯定好睇過戲！
（周一凌晨3時30分開賽）
「紫金兵團」自全明星周末後表現全面復甦，二十八輪常規賽贏足二十場成功趕上季後賽尾班車，球會總經理古查克（Mitch Kupchak）前日寫包單，表示主帥迪安東尼來季肯定繼續留隊。迪帥執教經驗豐富，曾兩次率領太陽殺入西岸決賽，即使球隊王牌高比拜仁（Kobe Bryant）因傷提早收咧，球迷依然對由迪帥執教及杜域侯活（Dwight Howard）「孭飛」的湖人抱有極大期望。原來迪安東尼歷來三次於季後賽帶領太陽鬥普波維治領軍的馬刺，不約而同都輸波收場（表），擺明格食格！
高比通宵諗計幕後發功
馬刺亦「唔好得幾多」，新加盟的前得分王麥基迪不單技術了得，作戰經驗亦非常豐富，但職業生涯每逢躋身季後賽都一定在首圈出局，堪稱「佗衰家」。雙方一樣黑到爆，不過湖人之寶高比拜仁就拒絕認命，就算因跟腱撕裂提早收咧都一樣交足貨，前日更自爆度橋度通宵研究如何擊敗馬刺，又透露會透過電話及短訊向迪帥及隊友獻計，實行幕後發功。馬刺踏入季尾搏到殘，柏加（Tony Parker）及鄧肯（Tim Duncan）皆露疲態，加上真路比利（Manu Ginobili）剛傷愈，狀態肯定未回到高峰，讓到湖人8.5分實在太過，所以寧捧常規賽最後五場連勝成功衝線的湖人，捧下盤！