政情：議員任期倒數3個月 陳沛然仍請兼職議助
今屆立法會任期將會喺10月底完結，換言之議員嘅任期只剩番3個月左右。雖然得番咁少時間，之但係仲有議員聘請兼職議員助理喎，咁短時間仲可以做啲乜嘢呢？
話說醫學界議員陳沛然（Pierre）上周五喺Facebook專頁，以「陳仔搵工頻道」為題貼文，轉貼咗招聘廣告，希望可以請到一位兼職議員助理，負責政策研究，編輯及校對工作，為期3個月。
協助做醫療政策報告
點解要請個短期嘅兼職議助？原來佢係要做份醫療政策研究報告。咁遲先嚟做？佢話之前嗰幾年做資料搜集，依家係收成時間喎。即係啲料夠晒嘞，可以寫報告嘞！
之不過，似乎至今仲未有聲氣請到人，唔知Pierre要用幾耐時間先請到呢位小幫手呢？