政情：甘文鋒上海讀博士 憂坐疫監好困擾
最近唔少政界中人都紛紛報讀唔同課程自我進修，有人選讀清華大學，而有人就揀上海復旦大學。講緊嘅係屯門區前區議員甘文鋒，佢日前獲得復旦大學國際關係與公共事務學院政治學理論專業博士研究錄取，將會喺今年9月開學，但佢就擔憂受疫情關係，北上求學隔離成最大問題。
滬港兩邊走 或上網上課
早前有多位政界人士，包括議員陸頌雄同郭偉强等，都表示自己報讀咗清華大學高級公共管理碩士（EMPA）香港政務人才項目，但甘文鋒就選擇到上海復旦攻讀博士課程，佢話今年1月就報名，至前幾日才有結果，知道自己獲得咗取錄都覺得好開心，並定下目標，要喺3至5年內完成博士課程。
佢又提到話，課程第一年預計每星期都要上一至兩堂面授課，所以會滬港兩邊走，至於太太會唔會有意見？佢就笑言留喺當地都係過一晚啫，但都要視乎疫情發展，如果屆時疫情仍未好轉，要返內地讀書，隔離便成大問題，到時可能用網上上課取代咁話。