政情：落區幫市民登記消費券 財爺幾分鐘搞掂麥美娟

陳茂波尋日落區幫手後喺網上分享相片，呼籲市民踴躍登記消費券，推動經濟復甦、救失業。佢提到有位女士仲未登記電子消費券，即刻用幾分鐘幫佢搞掂，但睇落覺得幾面熟喎，原來係議員麥美娟啊！仲有網民搞笑咁留言，話呢位女士真係幾面熟，聽講佢真係唔識電腦，辛苦晒司長喇。

希望政府優化登記系統

其實係麥美娟所屬嘅工會邀請財爺教路，同大家分享登記同使用消費券嘅小貼士。佢亦即場向對方反映有好多長者唔識使用又或者冇智能手機同電子支付平台，喺內地居住嘅港人喺申請過程中都遇到唔同困難。佢就建議政府加強支援、優化登記系統、投放更多資源推廣教育喇。