政情：中環出更：李桂蘭祝賀壽包變隆胸矽袋

身為大律師嘅Peter七十大壽，七十位賓客歡聚一堂。大仔戴振華、女兒戴尚蓮及三仔戴尚文，遠道由英國返港，夠晒孝順。身為Olivia姐姐嘅前民政事務局常秘李麗娟，亦專程祝賀。戴家子女向來有藝術細胞，擅長攝影嘅二子戴尚安，帶頭為爸爸拍攝一段搞笑紀錄片，片中搬出爸爸當年追女仔嘅陣年舊照，嘲笑父親頭頂髮絲今非昔比。咁大整蠱，Peter睇完不但唔嬲，仲笑到見牙唔見眼，難得仔女們通宵達旦拍片博佢一笑，呢份心意，冧晒啦！

派對重頭戲，係切蛋糕環節，Olivia知道老公鍾情壽包，一早柯打咗七十個，意頭十足，「壽包山」一推出來，賓客嘩然。有外籍女賓客好奇大叫：「係乜嚟o架，點解有咁多矽袋？」矽袋？天真嘅一問，嚇到主人家唔知好嬲定好笑，急忙解釋。