政情：郊園邊陲建屋 欠民意支持 懶游說累事
本港接連遭受社會事件同新冠疫情衝擊，主事官員被炮轟辦事不力。有議員曾批評問責官員好似「飲早茶搭枱嘅茶客」，冇溝通、冇聯繫，亦冇團隊精神為香港止暴制亂及控制疫情，強調係「人嘅問題」。另有議員近日亦以飲茶做比喻，指官員就係茶樓夥計，但係無落力向茶客推介新推出嘅點心。睇嚟無論政府官員係茶客定係夥計都做得唔好啊！講緊乜嘢先？咪就係郊野公園邊陲地建屋囉！
公營房屋供應嚴重短缺，輪候公屋時間要等5.8年，創22年新高。早前社會上有聲音提議，希望政府能夠重新考慮喺郊野公園邊陲地帶興建居屋。實際上，工程界議員盧偉國（WK）所屬嘅經民聯早前亦提出類似嘅建議，然而政府早前表明暫時無意重啟研究呢個項目，又話土地供應專責小組早前研究顯示，呢個選項未得到大多數市民支持，所以未有列為優先研究嘅土地供應選項之一。
議員以飲茶為喻 指夥計應推介新點心
可能見政府搵專責小組做擋箭牌，WK近日話可以考慮喺毗鄰郊野公園嘅水泉澳建屋，因為水泉澳附近已經有公共屋邨，有足夠基建配套增加居住人口。佢仲質疑土地供應專責小組只以「剔點心紙」嘅做法嚟簡單詢問市民選擇意願，以致建議開發郊野公園邊陲地嘅支持度偏低。佢話香港平地唔多，儘管移山與填海係過去開發土地嘅重要手段，但兩者近年來都變得「罪惡」，尤其係佔全港土地面積高達四成嘅郊野公園，連少少邊陲地都唔掂得。佢認為政府若能對各種土地發展選項詳加解釋，市民對開發郊野公園邊陲地嘅觀感可能會有改變。佢亦以飲茶做比喻，指茶樓就算設有點心紙，茶樓夥計都會不吝唇舌，向茶客推介新推出嘅點心，所以政府有需要向市民多加游說。
雖然話要詢問市民意願，但WK又認為某情況下市民所認知係有啲局限，所以政府施政有時候都唔能夠完全依照市民嘅選擇去做，否則施政就會欠前瞻性，談不上係良政善治囉！