政情：李家超首以司長身份 晤內會正副主席
政務司司長李家超尋日首次以司長身份同立法會內務委員會正副主席會面。李家超期望同議員緊密合作，共同促進行政立法關係，又話政府會致力同立法會保持有效溝通及緊密聯繫，配合立法會監察政府嘅工作，共同維護香港整體利益，為香港市民服務。
李家超話會多撥時間同立法會議員聯繫，就政府將喺本屆立法會任期完結前提交嘅立法建議同撥款建議交換意見。
稱全力配合立會審議工作
佢又話將帶領相關政策局，全力配合立法會喺餘下任期嘅審議工作。而喺會面期間，佢話會全力支持行政長官施政，按照《基本法》全面準確落實一國兩制，並落實「愛國者治港」嘅理念。