政情：房策冇招 陳帆又開期票

等上樓平均5.7年 基層叫救命

話說立法會過渡性房屋及劏房事宜小組委員會主席鄭泳舜（Vincent），尋日同陳帆一齊討論本地劏房問題。依家輪候公屋時間平均都要5.7年，Vincent就話要解決輪候公屋市民嘅短期需要，就要加快興建過渡性房屋、發放現金津貼同盡快就劏房租務管制立法。Vincent話雖然政府已經搵好地方興建14,000個過渡性房屋單位，但就趁呢個機會向陳帆追數，話見到要下年底先會增加單位供應，希望政府可以縮短興建時間。

陳帆就叫Vincent放心喎，舉例指元朗江廈圍項目將提供1,998個單位，料第一期單位喺明年初就會落成。佢又話以「組裝合成」建築法興建過渡性房屋會快好多，由城規會批准至建成只要一年幾時間，近排亦聽到有部分參與建屋計劃嘅夥伴，希望今年底有機會落成部分單位。

篤數逾31萬伙公屋排隊應市

喺資助非政府機構（NGO）租用酒店同賓館房間作過渡性房屋方面，佢提到依家已經同逾150個賓館及酒店營辦商討論詳情，料可提供超過1,500個房間，希望可以喺今個月內公布消息，政府亦會按計劃喺7月向非居於公屋及領取綜援，同時輪候公屋逾3年及未被首次編配公屋嘅合資格家庭，發放租金津貼。至於就劏房租務管制嘅立法工作，佢形容政府已經萬事俱備，只要完成法律草擬工作，就會交上立法會，強調今個立法年度一定會訂立呢個「死命令」喎。

陳帆又話政府去年底所覓得嘅土地，足以興建31.6萬個公屋單位，但前5年期及後5年期分別有約10萬及20萬個單位落成，承認短時間房屋供應有所欠缺，所以當下工作係壓縮土地平整、法律程序及建屋流程等時間，形容「短得一日得一日」喎。

其實要根本解決基層市民住屋問題，都係要增加土地及公營房屋供應，政府真係要加大力度做好相關工作先得嘞！