中環出更：收藏展移師北京 李秀恒鬧爆政府
明年係香港回歸廿周年，政府一早就氹商界及各界社團幫手籌辦各類慶祝活動，製造熱鬧氣氛，中華廠商聯合會（廠商會）梗係走唔甩喇！廠商會會長李秀恒（Eddie）、副會長戴澤良等人尋日公布一連串慶回歸活動，但其中嘅收藏展竟然係搬去北京搞，Eddie鬧爆係因為政府冇場地做展覽。
連串活動嘅使費涉及二千幾萬元，當中由廠商會與世界華人收藏家學會合作，明年六月至八月喺北京首都博物館聯合舉辦「香港藏家珍寶典藏大展」，展示香港收藏家所收藏嘅文物瑰寶。喜好收藏嘅Eddie都會運珍藏嘅明式家具去北京參展。咁正嘅寶貝，點解唔喺香港展出呢？
大呻香港無場搞
Eddie就呻話早喺半年前政府呼籲佢哋辦活動慶回歸時，佢即打算喺香港搵地方展出，由於保安理由，展出場地只能喺博物館，但係文化博物館正在裝修，所以佢哋就寫個計劃書畀歷史博物館，點知得到兩個字回覆：「無期」。
佢話後來得知歷史博物館明年六月將展出北京故宮養心殿嘅寶物。佢質疑呢啲寶物幾時展出都得喇，點解政府叫人支持慶回歸，但又唔支持本地收藏家，凸顯佢哋喺國寶回流、收藏、保護及文化推廣等多方面作出嘅貢獻？
卓妮