政情：微創切組織 畢東尼預告有排抖
早前以健康理由宣布辭任區議員職務同退出公民黨嘅觀塘區議員畢東尼，尋日喺社交媒體貼文話到聯合醫院進行微創切除組織手術。佢話呢個手術需時，仲有一定風險，希望能夠平安完成手術，出院後盡快返到辦事處工作。
到底係乜嘢病？畢東尼冇透露，但就話喺佢住院期間，街坊可以喺辦公時間內致電辦事處嘅電話，或者可以直接WhatsApp佢本人，而佢喺今日啲麻醉藥效退晒之後，醒番就會盡量回覆街坊喎。
早前宣布6‧1起辭任區議員
畢東尼喺上年去英國探親，隨後因變種新冠病毒爆發一度滯留當地，喺今年3月先回港。佢話本來預定咗今年1月1日回港，喺2月1日入院做手術，但滯留英國令進行手術嘅日子被迫推遲至今個月。佢又話返港之後感到身體大不如前，無論係體力定係精神上都比以往遜色不少，喺處理地區事務上亦感到吃力，意識到身體嘅狀況已經唔可以再應付區議員嘅日常工作。加上預料手術後需要接受長期治療，所以佢喺上月宣布由今年6月1日起辭任觀塘區議員，兼且退出香港政壇。