政情：失業火頭辣到住屋 陳帆起樓要督促

高官民望一直徘徊谷底

話說喺疫情爆發以嚟，失業率不斷攀升，最新失業率更高達7.2%，逾26萬人失業。失業問題咁嚴重，坊間呢一年嚟要求設立短期失業援助金嘅呼聲不斷，但政府就企硬唔做，搞到勞工界代表吳秋北前排公開狠批羅嘅就業服務被動，亦交唔出任何保就業項目，直斥政府對於失業問題放手不理。

政府同班問責高官嘅民望一直徘徊谷底，吳秋北尋日喺一個活動中亦再鬧政府拒設失業援助金，跟住將火頭由失業援助辣埋入房屋，炮轟政府房屋問題長期未解決，打工仔面對「衣、食、住、行」問題仍然困難，尤其係住得差，仲話未來一定會監督政府做好呢方面工作啊！換言之，咪即係督住陳帆去解決住房問題囉！

制訂政策過程漠視勞工

吳鬧爆政府多年嚟施政傾向商界，令本港長期面對財富高度集中、資本高度壟斷嘅問題，而且政策制訂嘅過程又只會用「重商界、輕勞工」嘅方式聽意見，最終導致依家拒絕改革同改變嘅局面，令打工仔分享唔到經濟發展嘅成果，基層嘅房屋困境問題猶如無底深淵。佢認為喺新時代要改變，要解決資本壟斷嘅問題，敦促政府唔好局限聽財團意見，又指只係一個已僵化、失去活力嘅資本主義唔可以繼續落去，否則好難持續發展咁話。

佢又以房屋問題為例，話如果政府施政唔係傾向商界，一早就有決心勇氣運用《土地收回條例》徵收好多長期空置囤積嘅土地，開展郊野公園邊陲土地同新界土地，從而重奪土地話事權，唔使見住樓價失控而束手無策喇！

根據土地供應專責小組喺2018年發表嘅數據顯示，香港雖然細，但已發展嘅土地只係約25%，當中住宅用途嘅土地更僅有7%，所以唔係冇地，只係政府班官有冇心做嘅問題啫！