中環出更：許正宇麥美娟互笠高帽
疫情搞到百業蕭條，唔少議員都促政府設立失業援助金，仲要喺多個場合都有提及過。日前議員麥美娟（Alice）再喺立法會上，明明追問緊失業援助金嘅事，講講吓，竟然同財經事務及庫務局局長許正宇互笠高帽，究竟搞邊科？
立法會財務委員會日前通過涉款150億元嘅百分百擔保個人特惠貸款計劃，喺審議期間，Alice先鬧爆勞工及福利局局長羅致光唔做嘢，形容羅「智商高但堅離地」、「豬隊友」，唔肯做失業援助金，只係設立保就業基金。鬧完人，Alice再追問許正宇會唔會追加第二階段嘅撥款，但許只係話會適時睇番經濟情況發展再諗。Alice聞言就話「適時」用字官僚，用嚟耍議員，認為許「年輕有為」，佢新加入政府唔應該學官僚嘢。
郭偉强頂唔順嗌停
許解釋話唔係耍大家、唔係學官僚作風，仲話係牽涉好多考慮因素，仲讚Alice好精幹，覺得佢為勞工發聲好感動喎。Alice隨後再話自己係讚許，同時再追問許會唔會加碼。眼見氣氛咁緊張，財委會主席陳健波話相信許見識到議員好緊張，仲讚Alice「年輕有為」。點知許就搶咪，話Alice唔止有為，仲「年輕貌美」添呀，現場隨即有陣陣笑聲。佢哋不停咁互笠高帽，唔係個個都受，排緊隊等發言嘅議員郭偉强就反問「你哋對答完喇可？」認真尷尬！
卓妮