政情：陳沛然見精神科醫生 鑊剷代筆畫球場

享受一片寧靜時刻

其實Pierre係訪問精神科專科醫生曾繁光，佢認同香港人被疫情折磨，而好大壓力，期間仲發現自己有啲精神緊張添啊。曾醫生就帶佢去畫室，Pierre話係初體驗，見到原來可以用鑊剷代替畫筆，覺得好有趣（口架）。佢畫咗一個足球場，話自己最鍾意喺黃昏時企喺球場中心，享受一片寧靜嘅時刻，仲可以容許自己放低傳呼機、電話、電腦，簡直係最放鬆嘅時候。

曾醫生形容Pierre落筆好果斷、專心，認為初接觸畫畫，最重要就係放膽，特別係畫出自己鍾意嘅環境，可以放鬆身心。曾又話有部分求助嘅個案，一聽到價錢就「走人」，因為佢哋根本冇工作，負擔唔到價錢。不過，曾醫生都照樣叫佢哋應診，希望幫到幾多就幾多。佢認為香港人喺呢一年已經逐漸適應疫情，預計下半年會減少出現焦慮嘅情況。