中環出更：時興低物欲主義 何順文：生活毋須太奢華
近年社會上亦興起慢消費、少消費、零消費同裸買4種新消費模式，得到唔少青年人嘅認同，就連恒生大學校長何順文都有留意呢個新趨勢，又話自己過去曾擁有兩部車、又追吓名牌手錶，但後來發現揸乜嘢車都只係代步，戴乜嘢錶都係咁準時，深感反璞歸真，簡單、實用就好，有時去吓旅行、做吓運動反而仲有滿足感，又話自己年事愈長，就愈覺得生活毋須太奢華。
何校長早前出席一個有關青年發展嘅講座，席間佢話留意到部分年輕人亦開始過低物欲嘅生活，而佢就奉行符合環保潮流嘅裸買，即是每逢去買外賣，都堅拒即棄餐具，盡量唔用膠袋，仲話太太仲環保過自己，買外賣一定會自備食物盒添！佢又覺得本港年輕一輩雖唔算富裕，但對可持續消費觀念應該有較強嘅認同，相信佢哋即使有經濟能力，都未必會瘋狂消費咁話。
蔡宗富：產品更講求精緻
同場嘅家庭與學校合作事宜委員會主席方奕展就覺得，部分後生仔傾向低物欲生活，可能係佢哋對消費社會嘅反思，亦可能係佢哋爭取理想生活方法嘅權利。方奕展話隨住社會嘅發展，年輕人未必想重複前人行過嘅路，佢哋可能會思考社會發展模式係咪只得一種呢？可能因為佢哋普遍關心社會發展嘅方向，想由自己做起，打造一個可持續發展嘅消費模式啦！
若果簡約生活一旦成為社會嘅主流，會否妨礙到經濟發展呢？香港鐘表業總會主席蔡宗富就認為，降低物質追求可視為一種實踐環保嘅態度。但縱使減少購物亦唔可能做到零消費，只不過係傾向審慎消費，咁就更加講求產品需精緻、耐用同高質，因應呢個潮流，廠商都應該與時俱進咁話。
卓妮