中環出更：四度被捕多案纏身窮途末路 上海仔照扮闊佬買珠寶

怕死出動4保鏢有女作伴

本報記者發現上海仔喺銅鑼灣一帶「蒲頭」，先去利園商場一間珠寶店購物，有兩名身穿西裝、佩戴黑色口罩嘅保鏢喺門外等候。晚上大約6點半，佢由兩名保鏢一前一後護送下到一間中菜餐廳用膳，當佢進入餐廳之後，另有兩名保鏢留守餐廳門外位置。即係佢食一餐飯，要動員4名保鏢，可能上海仔虧心事做得多、非常怕死。到上海仔步出餐廳，仲發現有一個戴鮮紅色口罩嘅女人作伴，睇怕不甘寂寞嘅上海仔，飽暖之後唔知仲有乜嘢下文呢？

棄保四處流竄 返港即被捕

四處流竄嘅上海仔於去年11月22日晚上返港，喺機場被捕，其後獲准以20萬元現金保釋外出，佢需要喺今年5月6日再去警署報到。翻查紀錄，上海仔曾涉及兩宗棄保潛逃案，首宗喺2016年7月，佢乘搭飛機由泰國返港，於機場被「O記」拘捕，涉嫌刑事誹謗、串謀傷人以及串謀刑事毀壞，其後獲准以5萬元保釋，要喺2018年5月就事件去警署續擔保，但當日並冇現身，被警方發出通緝令以及充公保證金。

「上海仔」郭永鴻	有女士（紅色口罩）陪同上海仔（白衣）。	上海仔（箭嘴示）到珠寶店購物，保鏢於門外守候。

另一宗棄保案則係涉嫌於2007年1月至2012年7月，清洗過億元懷疑黑錢，及後獲准以20萬元保釋候查。佢需要於2018年4月去警署報到，但竟然聲稱喺泰國中風而冇現身，及後就被影到身處柬埔寨一間賭場，行得企得，視警方如無物。

另外，曾四度被捕嘅上海仔亦正被澳門通緝。2015年12月，上海仔與同夥退休高級警司王福林喺澳門盜竊以及訛騙，偷取賭廳籌碼同現金總共6,000萬元，被澳門當局正式立案，兩人一旦入境澳門就會即刻被扣查，通緝令依家仲有效。

卓妮