政情：羅致光下月終肯到立會 靈魂恐在冥王星

銀齡卡相關事宜小組委員會上月26日舉行會議，由於羅當日並無出席，只派副局長何啟明到場，加深咗一眾議員對羅嘅不滿。其中，議員鄭泳舜更加形容羅唔止喺火星，而係遠在冥王星，要求何坐火箭或者穿梭機，將羅捉返地球，令佢知道地球發生咩事咁話。而柯仔當時就提出去信勞福局，敦促羅出席4月13日舉行嘅下次會議，建議獲在席議員一致通過。

柯創盛嘲或得肉體喺地球

對於羅致光最新回應答應話會出席，柯仔就認為政策局局長出席會議嘅話，可以更好了解議員同市民嘅心聲，令當局制訂政策時可以更加全面。佢形容今次係小勝一仗，但就希望唔好次次都要委員會寫信先至出席，希望羅可以安排好時間出席每一個會議。咁羅今次算唔算係返緊地球呢？柯就認為係言之尚早，擔心佢肉體喺地球，但靈魂可能仲喺冥王星，最終都係唔聽意見咁話喎。

被勸開口前三思 勿激化仇恨

之不過，羅過去多次發表惹火言論，例如曾經形容失業率上升為「只係多咗千幾人失業嘅啫」，近日更形容放無薪假只係「工作共享」，話呢個方法可以避免裁員，辣（興）咗唔少議員同市民。柯仔就寄語羅說話前要三思，希望佢睇到自己每次講完「冥王星話」，引發社會出現嘅負面反應。至於擔唔擔心佢喺會上再講「冥王星話」？柯就提醒，作為官員每句說話都係代表政府發言，希望羅思考係咪想社會更加激化、兩極，甚至對政府有更多仇恨，抑或真係想社會解決問題呢！