中環出更：談香薰抗疫 周樹堂：亂斬沉香樹得木無所用
新冠肺炎疫情除咗帶動口罩同消毒液嘅銷量，就連沉香都成為搶手貨。中華古文化沉香學會創會會長周樹堂早前主持一項抽獎活動，期間佢提到去年武漢疫情肆虐之際，當地嘅衞生部門向民眾推薦中醫藥居家預防方案，當中除咗呼籲大家要適度運動，又建議使用沉香香薰以辟穢化濁，對於肺系疾病尤其有效。
既然巿場上對沉香嘅需求大增，會否出現假貨魚目混珠嘅現象呢？周樹堂話內地沉香巿場過去的確有假貨，不過通常都係由東南亞輸入，由於疫情導致各地封關，內地沉香巿場嘅假貨反而絕迹。周樹堂又指天然野生沉香，形成時間起碼要幾十年甚至過百年，為紓緩龐大需求，因此巿場上亦有人工種植嘅沉香。儘管論品質，人工種植不及天然野生，但點都好過砍伐沉香樹，因為「沉香」係樹木受傷後，自行分泌樹脂療傷所結嘅痂，反而樹木本身嘅價值唔大，若果貿然斬咗棵樹，同得到一舊廢木冇乜分別。
廖書蘭：聞其香氣 靈感如泉湧
沉香既可燃點，泡水飲用亦得。從事樽裝水生產嘅孔教學院名譽副院長駱建民，因鑑於沉香有養生效果，於是佢將沉香融於鹼性水以開發另一種飲用商品。為確保產品不含重金屬或化學成分，駱建民寧可選用野生沉香，亦因此形成每一樽沉香水，味道不盡相同嘅特點。有見自然環境之可貴，佢嘅樽裝水生意亦推行膠樽回收計劃，透過現金回贈以鼓勵消費者盡量減少浪費。
鄉議局新界傳統文化委員會委員廖書蘭，都係一位熱愛沉香嘅人士。佢目前收藏兩件沉香分別放喺書枱同床邊，話有時寫作欠靈感，會手握沉香感受其芬芳香氣，心境漸趨平和寫作靈感方可如泉湧至，而沉香放喺床邊則有助紓緩壓力，寧神安睡。
卓妮