政情：公民講場：疫苗恐慌 孔繁毅火速解畫 難阻長者縮沙

政府不斷鼓勵60歲以上長者接種新冠疫苗，然而日前所發生嘅接種疫苗後死亡個案，就嚇怕唔少銀髮族。為安撫公眾，新冠疫苗顧問專家委員會成員孔繁毅好快撲出嚟解畫，話死者生前有長期病患，佢嘅不幸同接種疫苗冇直接關係，又指長期病患者只要病情控制得好，係適合接種新冠疫苗喎。之不過年紀大、機器壞，好多銀髮族都有長期病患，而若果病情控制得差，都唔會自己行入接種中心啦。其實接種疫苗就係透過以毒攻毒嘅方式去抵抗病毒，難免存在風險。依家有人出咗事，任憑專家費盡唇舌，都難阻已預約接種疫苗嘅長者，紛紛打退堂鼓。