中環出更：年輕人對前途迷惘 莊偉茵：唔放棄就冇得輸
疫情持續，唔單止失業率屢破新高，唔少應屆畢業生都搵唔到工，好多年輕人都覺得前途迷惘呀。中華電力公司企業發展總裁莊偉茵（Quince）早前參與一個校園節目，話佢當年80年代大學畢業嗰時，都經歷過香港前途危機問題，但佢就勉勵年輕人只要抱住正面嘅心態就唔會輸，香港永遠都係一個充滿機遇嘅地方呀！
Quince話自己當年大學畢業正好經歷移民潮，但當時佢冇條件走，加上覺得香港係自己屋企，反問點解要走呢？放眼今日，佢話作為父母都好明白後生仔好難喺社會向上流動，但佢就鼓勵大家千祈唔好放棄希望，反而話要永遠留有一顆願意學習、不斷提升自己嘅心。佢又話只要利用數碼時代嘅優勢同埋無窮嘅創意，喺呢個世代一定冇得輸。
陳浩濂返「娘家」感觸
雖然香港作為國際金融中心，但金融業範疇龐大，唔少後生仔喺摸索階段都遇到困難喎。財經事務及庫務局副局長陳浩濂（Joseph）早前就同香港特許金融分析師學會嘅準考生作視像對話，同後生仔傾吓偈之餘，都解答番佢哋嘅疑問。Joseph話呢班後生仔要抽出食飯嘅時間參與對話，見到佢哋緊張自身嘅生涯規劃都好欣慰，之不過佢擔任講者就冇飯食喇！佢又話見到班後生仔都會諗番自己細個啱啱踏足金融業界，當時都認為摸索階段的確困難，而佢之前都係該會嘅副會長，返到「娘家」都感觸喎。
至於一早過咗搵工階段、如今身為公司老闆嘅保良局副主席林潞（Calvin）同樣面對挑戰。佢提到公司廠房位於內地，以往成日往返兩地視察，但受疫情影響，差唔多成年冇去內地。問到佢冇得親眼睇住廠房運作，會唔會唔放心，佢話公司已經成立半世紀，業務早已經上咗軌道，都好放心嘅。雖然身為老闆，但Calvin都呼籲大家要關心勞工階層，共度時艱呀。
卓妮