中環出更：心急做檢測 陳永棋唔記得戴罩
政府近日力推全民檢測計劃，繼立法會議員集體做檢測後，部分政商界人士尋日去灣仔會展做「特別場」檢測，其中香港廣東社團總會永遠榮譽主席陳永棋竟然唔記得戴口罩。
喺「口罩令」下，強制市民喺街上要戴口罩。唔知係咪太心急，陳永棋尋日一落車就急急腳咁行去前面向傳媒揮手，直至傳媒影完相，佢都冇察覺自己冇戴口罩，好彩畀人提一提醒，佢先返上車戴口罩，之後再入場做檢測。
跟住見到香港中小型律師行協會創會會長陳曼琪（Maggie）做完檢測出嚟嘅。Maggie話雖然之前去北京開會都做過咽喉拭子，但做鼻咽拭子就第一次，覺得成個過程好快好舒服，又讚「醫護人員好溫柔、好專業」，仲話鼻咽採樣嘅感覺好似「洗鼻哥」咁，做完都冇打乞嗤，話覺得好安心喎。
對於點睇市民對全民檢測反應唔算積極，Maggie話接受測試唔單止喺對自己健康負責，仲係對屋企人同社會負責嘅態度，又指本港依家用好大成本先可以令疫情感染數字回到單位數字，如要防止疫情反彈，就需要大家接受檢測搵到源頭，咁先可以令香港喺防疫中處於一個不敗之地。
史立德形容過程「快靚正」
其實香港中華廠商聯合會第一副會長史立德（Allen），特登喺計劃推出嘅第一日就去做檢測，佢形容過程「快、靚、正」，冇不適感覺咁話。Allen話檢測樽上並冇載有任何個人資料，認為唔使太擔心私隱問題。佢又期望喺疫情緩和後，可加快推展港版「健康碼」，恢復粵港澳三地嘅人員流動，令工商界可往返內地處理業務，加快重啟經濟步伐。
卓妮